20180716 紀念日之踩足一世紀

每年有一日（七月十六日）係風雨不改都要由大埔踩去沙田，因為12年前我地就係咁踩去沙田註冊，沒有其他比這樣紀念更有意義了，不過唔係年年都有朋友可以同行，今年星期一，能夠來的不多，所以我們安排了上午我地兩個先踩個100km，英文叫century，不妨叫『世紀』，咁即係踩足一世，又幾好意頭bor。

但天有不測風雲，連續成個星期都唔好天，星期一都話有雨，冇法，下午公開的活動取消，但兩人一生一世係唔會變，所以100km推遲一小時開始，一於風雨同路，半日的活動改成一天的活動。

其實條線冇特別安排，主要的要求是唔好上山落山，避開公路，又唔想踩路面不平不停要上車落車的單車徑，係，冇錯，香港根本唔會有咁樣的路比你踩，同兩個人生活想無風無浪一樣係妄想，pre-trip搵左條路，大埔去馬鞍山再走沙田返回大埔，咁樣會有30公里，亦即係話踩三個圈再加十公里就夠數了，悶係悶ｌ，但有心愛的同路人就可以克服掛。

不過由於下午活動取消，反正都要搵地方食晏，就決定走一轉粉嶺，食個拉麵，順便減少一個圈。結果100公里是這樣安排的，先走一圈大埔→馬鞍山→沙田→大埔 （30k），兩轉大埔→科學園→大埔（17k），午飯大埔→聯和墟→大埔（25k），大埔→沙田大會堂影返張相→馬鞍山某處（計準條數）→大埔（18k）。

不過天氣真係非常unforgiving，落下狂風暴雨又曬下烈焰驕陽，整濕晒你又同你曬返乾，最大穫仲係成個吐露港都係白頭浪，大部份係頂風或側風踩，原本預左輪流破風，點知我懶慣唔識做破風手，最後都係我在後面坐享其成居多。辛苦晒啦 honey。唔怪止得跟住果朝我仲可以去上個海下踩返轉山試車。

今次幾好玩，又試到自己實力，畢竟有人未踩過 metric century，今次話佢聽都唔係咁難。而我自己自從十幾年前 Oxford踩去 London100+公里後都冇機會再踩咁遠，咁原來仲得，又可諗下個真正的 century(即係160公里)了。

今次原本想去大埔蔡潤記食個河粉早餐先出發，點知新舊兩間都休星期一。

聯和墟食爵士拉麵原本預左佢休息要 plan B去食山東餃子點知又食到拉麵。

踩100k沿途唔食下野你估我地係專業運動員咩，好在買到冰菠蘿，小販好似不容於政府，但實際上我地需要佢地。

持牌小販買少見少了，趁仲有要趁惜。今次我地唔食雪條了，每人飲左罐可樂。

My first metric century @ Youtube
https://youtu.be/VBYizggXhwQ

Check out Morning Jul 16th on Relive! 

https://www.relive.cc/view/g22702428841

後記：踩住架14kg鐵車完成左100km先即晚去買左架8kg的單車來預備第二日去外地踩，6kg的行李重量絕對係必要的吧。